ಮನೆಗೊಂದು ಗ್ರಂಥಾಲಯದ ಮೂಲಕ ಮನೆಯೊಳಗೆ ಜ್ಞಾನದ ಗುಡಿ ಕಟ್ಟಿದ ಮಕ್ಕಳು: ಶ್ರೀ ಮರಿಶಾಂತವೀರ ಸ್ವಾಮೀಜಿ

Kanndanet News

ದೊಡ್ಡವರು ಊರಿಗೊಂದು ಗುಡಿ ಕಟ್ಟಿದರೆ, ಮಕ್ಕಳು ‘ಮನೆಗೊಂದು ಗ್ರಂಥಾಲಯ’ ಮಾಡುವ ಮೂಲಕ ತಮ್ಮ ಮನೆಯೊಳಗೇ ಜ್ಞಾನದ ಗುಡಿ ಕಟ್ಟಿದ್ದಾರೆ ಎಂದು ಶ್ರೀ ಗವಿಮಠ ಸಂಸ್ಥಾನದ ಕಡಲಬಾಳು ಶಾಖಾ ಮಠದ ಶ್ರೀ ಮರಿಶಾಂತವೀರ ಮಹಾಸ್ವಾಮಿಗಳು ಹೇಳಿದರು.

ಕೊಪ್ಪಳದ ಶ್ರೀ ಗವಿಮಠ ಆವರಣದಲ್ಲಿ ಅಕ್ಟೋಬರ್ 03ರಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಕನ್ನಡ ಪುಸ್ತಕ ಪ್ರಾಧಿಕಾರ, ಗದಗ ಜಿಲ್ಲಾ ಜಾಗೃತ ಸಮಿತಿ, ಶಾಲಾ ಶಿಕ್ಷಣ ಇಲಾಖೆ ಗದಗ, ಕೊಪ್ಪಳದ ಗವಿಮಠ ಹಾಗೂ ಮುಂಡರಗಿ ತಾಲೂಕಿನ ಹೆಸರೂರು ಸರ್ಕಾರಿ ಪ್ರೌಢಶಾಲೆಯ ಸಂಯುಕ್ತ ಆಶ್ರಯದಲ್ಲಿ ಹಮ್ಮಿಕೊಂಡಿದ್ದ ‘ಶಾಲಾ ಮಕ್ಕಳ ಮನೆಗೊಂದು ಗ್ರಂಥಾಲಯ ಅನುಷ್ಠಾನ’ ಸಮಾರಂಭವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

‘ಗ್ರಂಥವೇ ಒಂದು ಆಲಯ’, ಅಂದರೆ ಪುಸ್ತಕವೇ ದೇವಾಲಯವಿದ್ದಂತೆ. ಗ್ರಂಥಾಲಯದಿಂದ ಹೊರಗಿದ್ದಾಗ ಹೊರಗಿನ ಗದ್ದಲ ಕಾಣಿಸುತ್ತದೆ, ಅದೇ ಒಳಗಡೆ ಕುಳಿತು ಪುಸ್ತಕ ಓದಿದಾಗ ಮನಸ್ಸಿನೊಳಗಿನ ಗೊಂದಲ ಮತ್ತು ಅರಿವು ತಿಳಿಯುತ್ತದೆ. ನಮ್ಮಲ್ಲಿರುವ ರಾಗ-ದ್ವೇಷ, ದುಃಖ, ಕಾಮ, ಕ್ರೋಧಾದಿ ಭಾವನೆಗಳನ್ನು ನಿಯಂತ್ರಿಸುವ ಶಕ್ತಿ ಜ್ಞಾನಕ್ಕಿದೆ. ಅಂತಹ ಜ್ಞಾನ ಪುಸ್ತಕಗಳಿಂದ ಮಾತ್ರ ಸಾಧ್ಯ ಎಂದರು.

ಮಕ್ಕಳಲ್ಲಿ ಓದುವ ಹವ್ಯಾಸ ಬೆಳೆಯಬೇಕಾದರೆ, ಮೊದಲು ಪಾಲಕರು ಪುಸ್ತಕಗಳನ್ನು ಓದುವುದನ್ನು ಕಲಿಯಬೇಕು. ತಂದೆ-ತಾಯಿ ಫೇಸ್‌ಬುಕ್, ಪಾಸ್‌ಬುಕ್ ಅಂತ ಕಾಲ ಕಳೆಯದೆ ಉತ್ತಮ ಪುಸ್ತಕಗಳನ್ನು ಓದುವ ಸಂಸ್ಕೃತಿ ರೂಢಿಸಿಕೊಂಡರೆ ಮಕ್ಕಳು ಕೂಡ ತಾವಾಗಿಯೇ ಓದಲು ಕಲಿಯುತ್ತಾರೆ. ಮುಂಡರಗಿ ತಾಲೂಕಿನ ಹೆಸರೂರು ಸರ್ಕಾರಿ ಪ್ರೌಢಶಾಲೆಯ ವಿದ್ಯಾರ್ಥಿಗಳು ಈ ಅಭಿಯಾನದ ಮೂಲಕ ತಮ್ಮ ಊರಿನ ಹೆಸರನ್ನು ಸಾರ್ಥಕಗೊಳಿಸಿದ್ದಾರೆ ಎಂದು ಶ್ರೀಗಳು ಮೆಚ್ಚುಗೆ ವ್ಯಕ್ತಪಡಿಸಿ, ಮಕ್ಕಳಿಗೆ ಹಾಗೂ ಶಿಕ್ಷಕ ವೃಂದಕ್ಕೆ ಶುಭ ಹಾರೈಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಕನ್ನಡ ಪುಸ್ತಕ ಪ್ರಾಧಿಕಾರದ ಅಧ್ಯಕ್ಷರಾದ ಡಾ. ಮಾನಸ ಅವರು ಮಾತನಾಡಿ, ಕನ್ನಡ ಪುಸ್ತಕ ಪ್ರಾಧಿಕಾರ ಆರಂಭವಾಗಿ 33 ವರ್ಷಗಳಾಗಿದ್ದು, ತಾವೇ 10ನೇ ಅಧ್ಯಕ್ಷರಾಗಿದ್ದಾರೆ ಎಂದು ತಿಳಿಸಿದ ಅವರು, ಇಂದಿನ ಮೊಬೈಲ್ ಮತ್ತು ಇಂಟರ್ನೆಟ್ ಯುಗದಲ್ಲಿ ಎದುರಾಗಿರುವ ಸಮಸ್ಯೆಗಳನ್ನು ಸವಾಲಾಗಿ ಸ್ವೀಕರಿಸಿ ಕಾರ್ಯನಿರ್ವಹಿಸಲಾಗುತ್ತಿದೆ‌ ಎಂದರು.

ಕನ್ನಡ ಪುಸ್ತಕ ಪ್ರಾಧಿಕಾರದ ವತಿಯಿಂದ ಇಡೀ ರಾಜ್ಯಾದ್ಯಂತ ಸುಮಾರು ಒಂದು ಲಕ್ಷ ಮನೆಗಳಲ್ಲಿ ಗ್ರಂಥಾಲಯಗಳನ್ನು ಸ್ಥಾಪಿಸುವ ಗುರಿ ಹೊಂದಲಾಗಿದೆ. ಇದರ ಜೊತೆಗೆ ಶಾಲಾ ಮಕ್ಕಳ ಮನೆಗೊಂದು ಗ್ರಂಥಾಲಯ ಅನುಷ್ಠಾನಗೊಳಿಸುವ ಮೂಲಕ ಮಕ್ಕಳಲ್ಲಿ ಪುಸ್ತಕ ಸಂಸ್ಕೃತಿಯನ್ನು ಬೆಳೆಸಲು ಪ್ರೋತ್ಸಾಹಿಸಲಾಗುತ್ತಿದೆ. ಮಕ್ಕಳ ಮನಸ್ಸು ಹಸಿ ಮಣ್ಣಿನಂತೆ ಸೂಕ್ಷ್ಮ ಹಾಗೂ ಪರಿಶುದ್ಧವಾಗಿದ್ದು, ಅವರಿಗೆ ಬಾಲ್ಯದಲ್ಲೇ ಪುಸ್ತಕ ಪ್ರೀತಿಯನ್ನು ಧಾರೆ ಎರೆಯಬೇಕು. ಬಾಲ್ಯದಲ್ಲಿ ಕಲಿತದ್ದು ಬದುಕಿನುದ್ದಕ್ಕೂ ಇರುತ್ತದೆ. ಹಾಗಾಗಿ ಮಕ್ಕಳಿಗೆ “ಮೊಬೈಲ್ ಬಿಡಿ” ಎಂದು ಬಲವಂತವಾಗಿ ಹೇಳುವ ಬದಲು, ಅವರ ಕೈಗೆ ಪುಸ್ತಕಗಳನ್ನು ನೀಡಿ ಓದುವ ಹವ್ಯಾಸವನ್ನು ಬೆಳೆಸಬೇಕು. ಮೊಬೈಲ್ ಎಂಬುದು ಬೆಂಕಿಯಂತೆ; ಅದನ್ನು ಹೇಗೆ ಸದ್ಬಳಕೆ ಮಾಡಿಕೊಳ್ಳಬೇಕು ಎಂಬುದನ್ನು ಮಕ್ಕಳಿಗೆ ಅರ್ಥಮಾಡಿಸಬೇಕು ಎಂದು ಸಲಹೆ ನೀಡಿದರು.

ಕರ್ನಾಟಕ ಜಾನಪದ ಅಕಾಡೆಮಿ ಸದಸ್ಯರಾದ ಡಾ. ಜೀವನಸಾಬ ಬಿನ್ನಾಳ ಅವರು ವಿಶೇಷ ಉಪನ್ಯಾಸ ನೀಡಿ, ಪುಸ್ತಕಗಳನ್ನು ಕೊಂಡು ಓದುವುದು ವ್ಯರ್ಥ ಖರ್ಚಲ್ಲ, ಅದು ನಮ್ಮ ಬದುಕಿಗೆ ಮಾಡುವ ಅತ್ಯುತ್ತಮ ಹೂಡಿಕೆ. ಕೇವಲ ಪದವಿ ಅಥವಾ ಅಂಕಗಳಿಗಾಗಿ ಓದುವುದು ವಿದ್ಯಾರ್ಜನೆಯಷ್ಟೇ; ಆದರೆ ಬದುಕನ್ನು ವಿಸ್ತರಿಸುವ, ವೈಚಾರಿಕ ಪ್ರಜ್ಞೆ ಮತ್ತು ಸಂವೇದನಾಶೀಲತೆಯನ್ನು ಬೆಳೆಸುವ ಪುಸ್ತಕಗಳನ್ನು ಓದುವುದು ನಿಜವಾದ ಜ್ಞಾನಾರ್ಜನೆ. ಇಂದಿನ ದಿನಗಳಲ್ಲಿ ಮೊಬೈಲ್, ವಾಟ್ಸಾಪ್, ಫೇಸ್‌ಬುಕ್‌ಗಳಿಗೆ ಗಂಟೆಗಟ್ಟಲೆ ಸಮಯ ವ್ಯಯಿಸುತ್ತಿರುವ ನಾವು, ಓದಿಗೆ ಮಾತ್ರ ದಿನದಲ್ಲಿ ಕೇವಲ ಒಂದು ಗಂಟೆಯನ್ನೂ ಮೀಸಲಿಡುತ್ತಿಲ್ಲ. ಇದು ವ್ಯಕ್ತಿಯ ಪ್ರಬುದ್ಧ ಬೆಳವಣಿಗೆಗೆ ಅಡ್ಡಿಯಾಗುತ್ತದೆ ಎಂದರು.

ಡಾ. ಬಿ.ಆರ್. ಅಂಬೇಡ್ಕರ್ ರವರು ವಿದೇಶದಿಂದ ಮರಳುವಾಗ ಯಾವುದೇ ಐಷಾರಾಮಿ ವಸ್ತುಗಳ ಬದಲಿಗೆ 24 ಟ್ರಂಕ್‌ಗಳಷ್ಟು ಪುಸ್ತಕಗಳನ್ನು ತಂದಿದ್ದರು. ನಿಮ್ಮ ಶತ್ರುಗಳು ನಿಮ್ಮ ಓದಿಗೆ ಮಾತ್ರ ಹೆದರುತ್ತಾರೆ, ಆದ್ದರಿಂದ ಓದಿರಿ” ಎಂಬ ಬಾಬಾಸಾಹೇಬರ ಸಂದೇಶವನ್ನು ಸದಾ ನೆನಪಿನಲ್ಲಿಟ್ಟುಕೊಳ್ಳಬೇಕು. ಡಾ. ಮಾನಸ ಅವರ ಅಧ್ಯಕ್ಷತೆಯ ಅವಧಿಯಲ್ಲಿ ಕನ್ನಡ ಪುಸ್ತಕ ಪ್ರಾಧಿಕಾರವು ಕೇವಲ ಮುದ್ರಣಕ್ಕೆ ಸೀಮಿತವಾಗದೆ, ಮನೆ-ಮನೆಗೆ ಮತ್ತು ವಿದ್ಯಾರ್ಥಿಗಳಿಗೆ ಗ್ರಂಥಾಲಯ ಪರಿಕಲ್ಪನೆಯನ್ನು ಕೊಂಡೊಯ್ದು ಓದುವ ಸಂಸ್ಕೃತಿಯನ್ನು ವಿಸ್ತರಿಸುತ್ತಿದೆ ಎಂದು ಹೇಳಿದರು.

ಮನೆಗೊಂದು ಗ್ರಂಥಾಲಯ ಗದಗ ಜಿಲ್ಲಾ ಜಾಗೃತ ಸಮಿತಿ ಸಂಚಾಲಕರಾದ ಎ.ಎಸ್. ಮಕಾನದಾರ ಅವರು ಮಾತನಾಡಿ, ಸಾಮಾಜಿಕ ಜಾಲತಾಣಗಳು ಹಾಗೂ ಮೊಬೈಲ್ ಬಳಕೆಯಿಂದ ಮಕ್ಕಳು ಬಾಲ್ಯವನ್ನು ಕಳೆದುಕೊಳ್ಳುತ್ತಿದ್ದು, ಇದರಿಂದ ಅವರ ದೈಹಿಕ, ಮಾನಸಿಕ ಆರೋಗ್ಯ ಹಾಗೂ ದೃಷ್ಟಿದೋಷದಂತಹ ಸಮಸ್ಯೆಗಳು ಎದುರಾಗುತ್ತಿವೆ. ಮಕ್ಕಳು ಮೊಬೈಲ್ ಗೀಳು ಬಿಟ್ಟು ಪುಸ್ತಕಗಳತ್ತ ಆಕರ್ಷಿತರಾಗಲು ಪ್ರತಿಯೊಬ್ಬರ ಮನೆಯಲ್ಲೂ ಗ್ರಂಥಾಲಯ ನಿರ್ಮಾಣವಾಗಬೇಕು. 190ಕ್ಕೂ ಹೆಚ್ಚು ದೇಶಗಳ ಅಧ್ಯಯನದ ಪ್ರಕಾರ, ಶೇಕಡಾವಾರು ಹೆಚ್ಚಿನ ಮಕ್ಕಳು ಮೊಬೈಲ್ ಮತ್ತು ಸಾಮಾಜಿಕ ಮಾಧ್ಯಮಗಳ ವ್ಯಸನದಿಂದಾಗಿ ಓದಿನ ಅಭಿರುಚಿಯಿಂದ ವಂಚಿತರಾಗುತ್ತಿದ್ದಾರೆ. ಇದನ್ನು ಸರಿಪಡಿಸಲು ಪುಸ್ತಕ ಸಂಸ್ಕೃತಿಯನ್ನು ಮರುಸ್ಥಾಪಿಸುವುದು ಅಗತ್ಯವಾಗಿದೆ. ಮುಂಡರಗಿ ತಾಲೂಕಿನ ಹೆಸರೂರು ಸರ್ಕಾರಿ ಪ್ರೌಢಶಾಲೆಯ ವಿದ್ಯಾರ್ಥಿಗಳು ತಮ್ಮ ಪಾಕೆಟ್ ಮನಿ ಹಾಗೂ ದುಡಿಮೆಯ ಹಣದಿಂದ ಪುಸ್ತಕಗಳನ್ನು ಖರೀದಿಸಿ, ತಮ್ಮ ಮನೆಗಳಲ್ಲಿಯೇ ಗ್ರಂಥಾಲಯ ರೂಪಿಸಿಕೊಳ್ಳಲು ಮುಂದಾಗಿರುವುದು ಇಡೀ ನಾಡಿಗೆ ಮಾದರಿಯಾಗಿದೆ ಎಂದು ಶ್ಲಾಘಿಸಿದರು.

ಕರ್ನಾಟಕ ಚಲನಚಿತ್ರ ಅಕಾಡೆಮಿ ಸದಸ್ಯರು ಹಾಗೂ ಜಿಲ್ಲಾ ಜಾಗೃತ ಸಮಿತಿ ಸದಸ್ಯರಾದ ಸಾವಿತ್ರಿ ಮುಜುಮದಾರ್ ಅವರು, ಪುಸ್ತಕಗಳನ್ನು ಹೆಚ್ಚೆಚ್ಚು ಓದಿದಷ್ಟೂ ವ್ಯಕ್ತಿಯಲ್ಲಿ ಜ್ಞಾನ ವೃದ್ಧಿಸುವುದರ ಜೊತೆಗೆ ಸಮಾಜದಲ್ಲಿ ಧೈರ್ಯವಾಗಿ ಓಡಾಡುವ ಆತ್ಮವಿಶ್ವಾಸ ಬರುತ್ತದೆ. ಮಕ್ಕಳಲ್ಲಿ ಅಕ್ಷರ ಸಂಸ್ಕೃತಿ ನೆಲೆಸಲು ಪ್ರತಿಯೊಂದು ಮನೆಯಲ್ಲೂ ಪುಸ್ತಕಗಳ ವಾತಾವರಣ ನಿರ್ಮಾಣವಾಗಬೇಕು. ಮುಂಡರಗಿ ತಾಲೂಕಿನ ಹೆಸರೂರು ಪ್ರೌಢಶಾಲೆಯವರು ಕೊಪ್ಪಳದ ಗವಿಮಠಕ್ಕೆ ಮಕ್ಕಳನ್ನು ಕರೆತಂದು ಈ ರೀತಿಯ ಕಾರ್ಯಕ್ರಮ ಆಯೋಜಿಸಿರುವುದು ಕೇವಲ ಹೊಟ್ಟೆಯ ಊಟಕ್ಕಲ್ಲ, ಮಕ್ಕಳ ಮನಸ್ಸಿಗೆ ಹಾಗೂ ತಲೆಗೆ ‘ಜ್ಞಾನ ಸಂಪತ್ತಿನ ವನಭೋಜನ’ ಮಾಡಿಸಿದಂತಾಗಿದೆ ಎಂದು ಹೇಳಿದರು.

‘ಮನೆಗೊಂದು ಗ್ರಂಥಾಲಯ’ ಕೊಪ್ಪಳ ಜಿಲ್ಲಾ ಸಂಚಾಲಕರಾದ ಜಿ.ಎಸ್. ಗೋನಾಳ್ ಅವರು ಮಾತನಾಡಿ, ಮನೆಯಲ್ಲಿ ಕೇವಲ ದೇವರ ಪೂಜೆ ಮಾಡುವುದು ಮಾತ್ರವಲ್ಲದೆ, ಪುಸ್ತಕವನ್ನು ತೆಗೆದು ಓದುವ ಸಂಸ್ಕೃತಿಯನ್ನು ಜೀವನದಲ್ಲಿ ರೂಢಿಸಿಕೊಳ್ಳುವುದು ಅತ್ಯಂತ ಮಹತ್ವದ್ದಾಗಿದೆ. ಓದುವ ಸಂಸ್ಕೃತಿಯನ್ನು ಬೆಳೆಸುವ ನಿಟ್ಟಿನಲ್ಲಿ ಪ್ರತಿಯೊಬ್ಬ ಪುಸ್ತಕ ಪ್ರೇಮಿಗಳ ಮನೆಗೆ ತೆರಳಿ ಗ್ರಂಥಾಲಯ ಉದ್ಘಾಟಿಸಿ, ಪ್ರಮಾಣಪತ್ರ ನೀಡುವ ಕನ್ನಡ ಪುಸ್ತಕ ಪ್ರಾಧಿಕಾರದ ಕಾರ್ಯ ರಾಜ್ಯಕ್ಕೆ ಮಾದರಿಯಾಗಿದೆ. ಪ್ರಾಧಿಕಾರದ ಅಧ್ಯಕ್ಷರಾದ ಮಾನಸ ಅವರು ಇಡೀ ರಾಜ್ಯಾದ್ಯಂತ ಈ ಕಾಯಕವನ್ನು ಅಚ್ಚುಕಟ್ಟಾಗಿ ಮುನ್ನಡೆಸುತ್ತಿದ್ದಾರೆ ಎಂದರು.

*ಮಠದ ಆವರಣದಲ್ಲಿ ಸಂಚಾರ:* ಕಾರ್ಯಕ್ರಮದ ನಂತರ ಪುಸ್ತಕಗಳ ಕಟ್ಟನ್ನು ಕೈಯಲ್ಲಿ ಹಿಡಿದು ಶ್ರೀಗವಿಮಠ ಆವರಣದಲ್ಲಿ ಸಂಚರಿಸಿ, ಶ್ರೀಗಳಿಗೆ ಭೇಟಿ ನೀಡಿ, ಅವರ ಆಶಿರ್ವಾದ ಪಡೆದ ವಿದ್ಯಾರ್ಥಿಗಳಿಗೆ ಶ್ರೀಗಳು ಅಭಿನಂದನಾ ಪ್ರಮಾಣ ಪತ್ರ ವಿತರಿಸಿದರು.

ಕಾರ್ಯಕ್ರಮದ ಕುರಿತು ರವಿ ದೇವರೆಡ್ಡಿ ಅವರು ಪ್ರಾಸ್ತಾವಿಕವಾಗಿ ಮಾತನಾಡಿದರು.

ಈ ಸಂದರ್ಭದಲ್ಲಿ ಕೊಪ್ಪಳ ಜಿಲ್ಲಾ ಜಾಗೃತ ಸಮಿತಿ ಸದಸ್ಯರಾದ ಬಸವರಾಜ ಬೂದೂರ, ಹೆಸರೂರು ಪ್ರೌಢಶಾಲೆಯ ಮುಖ್ಯೋಪಾಧ್ಯಾಯ ಎಸ್.ಸಿ. ಹರ್ತಿ, ಕ.ರಾ.ಸ.ನೌ. ಸಂಘದ ಮುಂಡರಗಿ ಅಧ್ಯಕ್ಷರಾದ ನಾಗರಾಜ್ ಹಳ್ಳಿಕೇರಿ ಹಾಗೂ ಶಾಲಾ ಎಸ್‌.ಡಿ.ಎಂ.ಸಿ ಅಧ್ಯಕ್ಷರಾದ ಶ್ರುತಿ ರ ಆರೇರ ಸೇರಿದಂತೆ ಇತರೆ ಗಣ್ಯರು, ಶಿಕ್ಷಕರು, ಎಸ್‌ಡಿಎಂಸಿ ಸದಸ್ಯರು, ಗ್ರಾಮಸ್ಥರು ಹಾಗೂ ಶಾಲಾ ಮಕ್ಕಳು ಉಪಸ್ಥಿತರಿದ್ದರು.

****