ಕೊಪ್ಪಳದ ಭರತ್‌ ಕಂದಕೂರ ಸೆರೆಹಿಡಿದ ʻಅಂಜನಾದ್ರಿʼಯ ಚಿತ್ರಕ್ಕೆ ಚಿನ್ನದ ಪದಕ

ಕೊಪ್ಪಳ: ಫೆಡರೇಷನ್‌ ಆಫ್‌ ಇಂಡಿಯನ್‌ ಫೊಟೋಗ್ರಫಿ(FIP)ಯ ಸಹಯೋಗದಲ್ಲಿ ಪಶ್ಚಿಮ ಬಂಗಾಳದ ಕಲ್ಕತ್ತಾ ಶಾಡೋ ಲೈನ್ಸ್‌ ಸಂಸ್ಥೆ ಏರ್ಪಡಿಸಿದ್ದ ಶಾಡೋಸ್ಕೋಪ್‌-2024 ರಾಷ್ಟ್ರ ಮಟ್ಟದ ಛಾಯಾಗ್ರಹಣ ಸ್ಪರ್ಧೆಯಲ್ಲಿ ಕೊಪ್ಪಳದ ಪತ್ರಿಕಾ ಛಾಯಾಗ್ರಾಹಕ ಭರತ್‌ ಕಂದಕೂರ ಸೆರೆಹಿಡಿದ ʻಅಂಜನಾದ್ರಿಯಲ್ಲಿ ಭಕ್ತರುʼ ಶೀರ್ಷಿಕೆಯ ಛಾಯಾಚಿತ್ರ ಕಲ್ಕತ್ತಾ ಶಾಡೋ ಲೈನ್ಸ್‌ನ ಚಿನ್ನದ ಪದಕ (KSL Gold Medal) ಪಡೆದುಕೊಂಡಿದೆ.

ʻಅವಿಶ್ವಾಸನೀಯ ಭಾರತʼ (Incredible India) ವಿಷಯಾಧಾರಿತವಾಗಿದ್ದ ಈ ಸ್ಪರ್ಧೆಯಲ್ಲಿ ಪ್ರಶಸ್ತಿ ಗಳಿಸಿರುವ ಈ ಚಿತ್ರವನ್ನು ಹನುಮಮಾಲೆ ವಿಸರ್ಜನೆ ಸಂದರ್ಭದಲ್ಲಿ ಸೆರೆಹಿಡಿಯಲಾಗಿತ್ತು. ಮಾಲೆ ವಿಸರ್ಜನೆಗಾಗಿ ಸೂರ್ಯೋದಯ ಸಮಯದಲ್ಲಿ ಅಂಜನಾದ್ರಿ ಏರುತ್ತಿರುವ ಹನುಮಮಾಲಾಧಾರಿಗಳನ್ನು ಒಳಗೊಂಡ ಈ ಚಿತ್ರದಲ್ಲಿ ಅಂಜನಾದ್ರಿಯ ಮನಮೋಹಕ ವಾತಾವರಣವನ್ನು ವಿಹಂಗಮವಾಗಿ ಸೆರೆಹಿಡಿಯಲಾಗಿದೆ.

ದೇಶದ ವಿವಿಧ ರಾಜ್ಯಗಳ 310  ಜನ ಛಾಯಾಗ್ರಾಹಕರ ಸಾವಿರಕ್ಕೂ ಅಧಿಕ ಸಂಖ್ಯೆಯ ಛಾಯಾಚಿತ್ರಗಳು ಸ್ಪರ್ಧೆಗೆ ಆಗಮಿಸಿದ್ದವು. ಖ್ಯಾತ ಛಾಯಾಗ್ರಾಹಕರಾದ ಜಿನೇಶ್‌ ಪ್ರಸಾದ್‌, ಸೌಮೆನ್‌ ಮಂಡಲ್‌, ಅರೂಪ್‌ ಭಟ್ಟಾಚಾರ್ಯಜಿ ತೀರ್ಪುಗಾರರಾಗಿ ಭಾಗವಹಿಸಿದ್ದರು.

* ಪತ್ರಿಕಾ ಛಾಯಾಗ್ರಾಹಕ ಭರತ್‌ ಕಂದಕೂರ

* ಕಲ್ಕತ್ತಾ ಶಾಡೋ ಲೈನ್ಸ್‌ನ ಚಿನ್ನದ ಪದಕ (KSL Gold Medal) ಪಡೆದ ಭರತ್‌ ಕಂದಕೂರ ಸೆರೆಹಿಡಿದ ʻಅಂಜನಾದ್ರಿಯಲ್ಲಿ ಭಕ್ತರುʼ ಶೀರ್ಷಿಕೆಯ ಛಾಯಾಚಿತ್ರ