ಕೊಪ್ಪಳದಲ್ಲಿ ಅಕ್ಷರದ ಬೀಜಗಳನ್ನು ಬಿತ್ತಿದ ಲಿಂ.ಶ್ರೀ ಮರಿಶಾಂತವೀರ ಶಿವಯೋಗಿಗಳು

– ಡಾ. ಪ್ರಕಾಶ ಬಳ್ಳಾರಿ

(ದಿ ೧೫-೦೬-೨೦೨೦ ರಂದು ಲಿಂ.ಶ್ರೀ ಮರಿಶಾಂತವೀರ ಮಹಾಸ್ವಾಮಿಗಳ ೫೩ ನೇ ಪುಣ್ಯ ಸ್ಮರಣೆಯ ನಿಮಿತ್ಯ )

ಅಕ್ಷರದ ಬೀಜಗಳನ್ನು ಬಿತ್ತಿದವರು
ಭಾರತದಲ್ಲಿ ಅನೇಕ ಸಾಧು-ಸಂತರು, ಪವಾಡ ಪುರುಷರು, ಶರಣರು, ದಾಸರು, ಸೂಫಿಗಳು, ಸಮಾಜ ಸೇವಕರು, ರಾಜಕಾರಣಿಗಳು, ವಿಜ್ಞಾನಿಗಳು, ಕವಿ-ಕಲಾವಿದರು ಹೀಗೆ ಇವರೆಲ್ಲ ವಿವಿಧ ನೆಲೆಗಳಲ್ಲಿ ಬದುಕನ್ನು ಕಂಡುಕೊಳ್ಳುವ ಮತ್ತು ಕಟ್ಟುವ ಕ್ರಿಯಾಶೀಲತೆಯನ್ನು ತೋರಿಸಿದ್ದಾರೆ. ಇವರು ಒಂದಲ್ಲ ಒಂದು ರೀತಿಯಲ್ಲಿ ಸಾಮಾಜಿಕ ಚಿಂತಕರೇ ಹೌದು. ತಮ್ಮ ನಂಬಿಕೆ, ನಿಲುವು ಹಾಗೂ ಬದ್ದತೆಯಿಂದ ತಮ್ಮ ಕಾರ್ಯ ಕ್ಷೇತ್ರವನ್ನು ವಿಸ್ತರಿಸುತ್ತ ಜಡ ಚೌಕಟ್ಟುಗಳನ್ನು ಒಡೆದು ಹಾಕಿ ಹೊಸ ದಾರಿ ಮತ್ತು ಹೊಸ ಚೌಕಟ್ಟು ನಿರ್ಮಿಸಲಿಕ್ಕೆ ಮುಂದಾದರು. ಅಂತೆಯೇ ಈ ನಾಡಿನಲ್ಲಿ ನಾಡು, ನುಡಿ, ಧರ್ಮ, ಶಿಕ್ಷಣ ಹಾಗೂ ಸಂಸ್ಕೃತಿಗಳನ್ನು ಕಟ್ಟುವ ಕಾರ್ಯಗಳು ಜರುಗಿದವು. ಈ ನಿಟ್ಟಿನಲ್ಲಿ ಬರದ ನಾಡಾಗಿದ್ದ ಕೊಪ್ಪಳÀದಲ್ಲಿ ಮೊದಲ ಬಾರಿಗೆ ಅಕ್ಷರದ ಬೀಜಗಳನ್ನು ಬಿತ್ತಿದವರು ಸಂಸ್ಥಾನ ಶ್ರೀ ಗವಿಮಠದ ೧೬ ನೇ ಪೀಠಾಧಿಪತಿಗಳಾಗಿದ್ದÀ ಶ್ರೀ.ಮ.ನಿ.ಪ್ರ.ಜ.ಲಿಂ. ಮರಿಶಾಂತವೀರ ಮಹಾಶಿವಯೋಗಿಗಳು .

ಶ್ರೀಗವಿಸಿದ್ಧೇಶ್ವರ ಮಿಡ್ಲ ಸ್ಕೂಲ್ ಸ್ಥಾಪನೆ
ಅದೆಂತಹ ಅಮೃತ ಘಳಿಗೆಯೋ, ತಪಸ್ಸಿನ ಫಲವೋ, ಯಾವ ಯೋಗದ ಬಲವೋ, ಸುದೈವವೋ ಶ್ರೀಗವಿಮಠದ ೧೬ ನೇ ಪೀಠಾಧಿಪತಿಗಳಾಗಿದ್ದ ಲಿಂ.ಶ್ರೀ ಮರಿಶಾಂತವೀರ ಮಹಾಶಿವಯೋಗಿಗಳು (ಭಾರತವು ಸ್ವಾತಂತ್ರö್ಯ ಆದ ನಂತರದಲ್ಲಿ ) ೧೯೫೧ ರಲ್ಲಿ ಶ್ರೀಗವಿಸಿದ್ಧೇಶ್ವರ ಮಿಡ್ಲ ಸ್ಕೂಲ್ ಸ್ಥಾಪಿಸಿ ಶಿಕ್ಷಣದ ಪ್ರಸಾರಕ್ಕೆ ಆಶ್ರಯ ನೀಡಿದರು. ಅಂದು ಶ್ರೀಗವಿಮಠದಿಂದ ಆರಂಭವಾದ ಅಕ್ಷರಗಳ ಬಿತ್ತನೆಯ ಕಾರ್ಯವು ೧೦-೧೨ ವರ್ಷಗಳವರೆಗೂ ಯಶಸ್ವಿಯಾಗಿ ಸಾಗಿತು. ಇದಾದ ನಂತರ ೧೯೬೩ ಶ್ರೀಗವಿಸಿದ್ಧೇಶ್ವರ ವಿದ್ಯಾವರ್ಧಕ ಸಂಸ್ಥೆಯನ್ನು ಆರಂಭಿಸಿ ಸುತ್ತಲಿನ ಹಳ್ಳಿಗಳ ಬಡ ವಿದ್ಯಾರ್ಥಿಗಳನ್ನು ಶ್ರೀಗವಿಮಠಕ್ಕೆ ಕರೆತಂದು ಶಿಕ್ಷಣದ ಎಲ್ಲ ಸೌಲಭ್ಯಗಳನ್ನು ಒದಗಿಸಿದ್ದರು. ಶಿಕ್ಷಣ ಸಂಸ್ಥೆಗಳನ್ನು ಉಳಿಸಿ ಬೆಳೆಸುವ ಸಲುವಾಗಿಯೇ ಶ್ರೀಮಠದ ಭೂ ಆಸ್ತಿಯನ್ನೆಲ್ಲ ಶಿಕ್ಷಣ ಸಂಸ್ಥೆಗೆ ದಾನ ನೀಡಿದ್ದರು. ಜ್ಞಾನದಾಸೋಹದ ಜೊತೆಗೆ ಅನ್ನದಾಸೋಹವನ್ನು ನಿರಂತರವಾಗಿ ಶ್ರೀಗವಿಮಠದಲ್ಲಿ ಇಟ್ಟಿದ್ದರು. ಇದರ ಫಲವಾಗಿಯೇ ಕೊಪ್ಪಳ ಜಿಲ್ಲೆಯಲ್ಲಿ ಅನೇಕ ಪ್ರತಿಭೆಗಳು ಇಂದು ಬೆಳಕಿಗೆ ಬಂದಿವೆ. ಈ ವಿದ್ಯಾ ಸಂಸ್ಥೆಯಲ್ಲಿ ಆಧ್ಯಯನ ಮಾಡಿದವರು ದೇಶ ಮತ್ತು ವಿದೇಶಗಳಲ್ಲಿ ಉನ್ನತ ಸ್ಥಾನದಲ್ಲಿದ್ದಾರೆ. ಶಿಕ್ಷಣ ಮತ್ತು ಉದ್ಯೋಗದಲ್ಲಿ ಅವಕಾಶ ಸಿಕ್ಕರೇ ತಾವೂ ಕೂಡಾ ಹೇಗೆ ಉನ್ನತಿಗೆ ಏರಬಲ್ಲೆವು ಎಂಬುದನ್ನು ಈ ವಿದ್ಯಾಸಂಸ್ಥೆಯಲ್ಲಿ ಓದಿದವರು ನಿರೂಪಿಸಿದ್ದಾರೆ. ಇಂದು ಶ್ರೀ ಗವಿಸಿದ್ಧೇಶ್ವರ ವಿದ್ಯಾವರ್ಧಕ ಟ್ರಸ್ಟ ಅಡಿಯಲ್ಲಿ ಪ್ರಾಥಮಿಕ ಶಿಕ್ಷಣದಿಂದ ಹಿಡಿದು ಬಿ.ಎ, ಬಿ.ಕಾಂ, ಬಿ.ಎಸ್ಸಿ ,ಬಿ.ಸಿ.ಎ, ಬಿ.ಬಿ.ಎಂ, ಬಿ.ಎಡ್, ಎಂ.ಎ, ಎಂ.ಕಾA, ಎಂ.ಎಸ್ಸಿ., ಆಯುರ್ವೇದ ಮೆಡಿಕಲ್ ಕಾಲೇಜು ಮತ್ತು ಪಿ.ಜಿ ಹೀಗೆ ಹತ್ತಾರು ಶಾಲಾ ಕಾಲೇಜುಗಳು ಈ ಭಾಗದ ವಿದ್ಯಾರ್ಥಿಗಳಿಗೆ ಜ್ಞಾನದ ಹಸಿವನ್ನು ನೀಗಿಸುತ್ತಲಿವೆ.

ಪೂಜ್ಯರ ಬಾಲ್ಯ ಹಾಗೂ ಜೀವನ
ಗದಗ ಜಿಲ್ಲೆಯ ರೋಣ ತಾಲೂಕಿನ ಸೂಡಿ ಗ್ರಾಮದ ಜುಕ್ತಿಹೀರೇಮಠದ ಬಸವಲಿಂಗಯ್ಯ ಹಾಗು ಶಾಂತಮ್ಮನವರ ಪುತ್ರರಾಗಿ ೦೩.೧೨.೧೮೮೮ ರಂದು ಜನಿಸಿದರು. ಇವರ ಮೂಲ ಹೆಸರು ಜುಕ್ತಿಹೀರೇಮಠದ ಗುರುನಂಜಯ್ಯ ಪೂಜ್ಯರ ವಿದ್ಯಾಬ್ಯಾಸವು ಉಪ್ಪಿನಬೇಟಗೇರಿ, ಅಬ್ಬಿಗೇರಿ, ಕೊಟ್ಟೂರು , ಹುನಗುಂದ ಈ ಮೊದಲಾದ ಪಾಠಶಾಲೆಗಳಲ್ಲಿ ಅಧ್ಯಯನ ಗೈದು ಉನ್ನತ ಶಿಕ್ಷಣಕ್ಕಾಗಿ ಸೊಲ್ಲಾಪುರ ಹಾಗೂ ಕಾಶಿಗೆ ತೆರಳಿದರು. ಸೊಲ್ಲಾಪುರದಲ್ಲಿ ವಾರದ ಮಲ್ಲಪ್ಪನವರ ಪಾಠಶಾಲೆಯಲ್ಲಿ ಸುಮಾರು ೫ ವರ್ಷ ಅಧ್ಯಯನಗೈದು ಸಂಸ್ಕೃತಸಾಹಿತ್ಯ, ವ್ಯಾಕರಣ, ನ್ಯಾಯ, ತರ್ಕ ಮುಂತಾದ ವಿಷಯಗಳಲ್ಲಿ ಪರಿಣಿತಿ ಪಡೆದರು. ಸೊಲ್ಲಾಪುರದ ವಾರದ ಮಲ್ಲಪ್ಪನವರು ನಡೆಸುತ್ತಿದ್ದ ಸಂಸ್ಕೃತ ಪಾಠ ಶಾಲೆಯಲ್ಲಿ ಓದುತ್ತಿದ್ದಾಗ ಅಲ್ಲಿಯ ನಾಲ್ವತ್ತವಾಡ ಶ್ರೀ ವೀರೇಶ್ವರ ಶರಣರ ಕ್ರಿಯಾಮೂರ್ತಿಗಳಾಗಿ ಬಿನ್ನಹಕ್ಕೆ ಹೋಗಿಬರುತ್ತಿದ್ದರು. ಅವರೊಡನೆ ವಯೋಮಾನದಲ್ಲಿ ಕಿರಿಯರಾಗಿದ್ದರೂ ಆಧ್ಯಾತ್ಮಿಕ ಸಂಬAಧ ಹೊಂದಿದ್ದರು.
ಪೂಜ್ಯರು ಶ್ರೀ ಗವಿಮಠಕ್ಕೆ ಬರಲು ಪ್ರೇರಣೆ ನೀಡಿದ ಘಟನೆ
೧೯೦೯ನೆಯ ಇಸ್ವಿ ಪೂಜ್ಯ ಮರಿಶಾಂತವೀರ ಶಿವಯೋಗಿಗಳ ಬದುಕನ್ನು ಹೊಸ ಪಥದತ್ತ ಕೊಂಡೊಯ್ದAತಹ ಕಾಲ ಘಟ್ಟವಾಗಿದೆ. ಆ ವರ್ಷ ಬಳ್ಳಾರಿಯಲ್ಲಿ ಸೊಲ್ಲಾಪುರದ ವಾರದ ಮಲ್ಲಪ್ಪನವರ ಅಧ್ಯಕ್ಷತೆಯಲ್ಲಿ ಅಖಿಲ ಭಾರತ ವೀರಶೈವ ಮಹಾಸಭೆಯ ೫ನೇ ಅಧಿವೇಶನ ಜರುಗಿತು. ಮಲ್ಲಪ್ಪನವರು ಅಧಿವೇಶನಕ್ಕೆ ಬರುವಾಗ ತಮ್ಮೊಂದಿಗೆ ವಿದ್ವಾಂಸರನ್ನು ಆಯ್ದ ಜಾಣ ವಿದ್ಯಾರ್ಥಿಗಳನ್ನು ಕರೆದುಕೊಂಡು ಬಂದಿದ್ದರು. ಬಳ್ಳಾರಿಯಲ್ಲಿ ಸಕ್ಕರಿ ಕರೆಡೆಪ್ಪನವರ ಮನೆಯಲ್ಲಿ ಪೂಜೆ, ಪ್ರಸಾದದ ವ್ಯವಸ್ಥೆಯನ್ನು ಮಾಡಲಾಗಿತ್ತು. ಅಧಿವೇಶನದ ಸಂಘಟಕರಲ್ಲಿ ಒಬ್ಬರಾದ ಗವಿಮಠದ ೧೫ನೇ ಪೀಠಾಧಿಪತಿಗಳಾಗಿದ್ದ ಜ|| ಶಿವಶಾಂತವೀರ ಮಹಾಸ್ವಾಮಿಗಳು (ಗಡ್ಡದಜ್ಜನವರು) ಸಹ ಅಲ್ಲಿಯೇ ಇದ್ದರು. ಈಶಾವಾಶ್ಯೋಪನಿಷತ್, ಛಾಂದೋಗೋಪ್ಯನಿಷತ್ತು ಬೃಹದಾರಣ್ಯಕೋಪನಿಷತ್ತು ಶ್ರೀಕರಭಾಷ್ಯ, ಕಾಮಿಕಾಗಮ, ಭತೃಹರಿ ನೀತಿಶತಕಮ್, ಸಾಂಖ್ಯ ವ್ಯಾಕರಣಾದಿ ಗ್ರಂಥಗಳನ್ನು ತಮಿಳುನಾಡಿನ ಸಂಸ್ಕೃತ ಪಂಡಿತರೊಬ್ಬರು ಹರಡಿಕೊಂಡು ಮಾರಾಟ ಮಾಡುತ್ತಿದ್ದರು, ಗ್ರಂಥಗಳನ್ನು ಕೊಳ್ಳಲು ಆಸಕ್ತರಾದವರಿಗೆ ತಮಿಳು ಬಾರದು ವ್ಯಾಪಾರಿಗೆ ಕನ್ನಡ ಬಾರದು ಹೀಗಾಗಿ ಅಲ್ಲಿಯೇ ಇದ್ದ ಗುರುನಂಜಯ್ಯ (ಮರಿಶಾಂತವೀರ ಮಹಾಸ್ವಾಮಿಗಳವರು) ಪುಸ್ತಕ ವ್ಯಾಪಾರಿಯೊಂದಿಗೆ ಸಂಸ್ಕೃತದಲ್ಲಿ ವ್ಯವಹರಿಸಿ ಪುಸ್ತಕಾಸ್ತರಿಗೆ ಗ್ರಂಥಗಳ ವಿವರಣೆ ಬೆಲೆ ಇತ್ಯಾದಿ ವಿವರಿಸಿ ಗ್ರಂಥಗಳನ್ನು ಕೊಡಿಸಿ ಸಹಕರಿಸಿದರು. ಅಲ್ಲಿಯೇ ಗ್ರಂಥಗಳನ್ನು ಕೊಳ್ಳುತ್ತಿದ್ದ ಜ|| ಶಿವಶಂತವೀರ ಶಿವಯೋಗಿಗಳು(ಗಡ್ಡದಜ್ಜನವರು) ಬಾಲಕನ ವಾಕ್‌ಚಾತುರ್ಯ, ಸಮಯಪ್ರಜ್ಞೆ, ಸಂಸ್ಕೃತ ಸಾಹಿತ್ಯ ಭಾಷೆಯ ಪ್ರಭುತ್ವ ಕಂಡು ಬೆರಗಾದರು, ಬಾಲಕನನ್ನು ಪಕ್ಕಕ್ಕೆ ಕರೆದು ಆತನ ಪೂರ್ವಪರಗಳನ್ನೆಲ್ಲ ತಿಳಿದುಕೊಂಡರು.
ಅಧ್ಯಯನ ಗೈಯಲು ಕಾಶಿಗೆ ಹೋಗುವ ವಿಷಯ ಕೇಳಿ ತಿಳಿದರು. ನಮ್ಮ ಮಠಕ್ಕೆ (ಕೊಪ್ಪಳ ಗವಿಮಠಕ್ಕೆ) ಬರುವೆಯಾ? ಎಂದೂ ಕೇಳಿದರು. ಈ ಎಲ್ಲ ಘಟನೆಗಳಿಂದ ಸಂಕೋಚದಿAದ ಶ್ರೀಗಳು ಮುದುಡಿ ಹೋದರು. ಮುಂದೆ ಕಾಶಿಯಲ್ಲಿ ದಶಕಗಳ ಕಾಲ ಅಧ್ಯಯನ ಮಾಡುತ್ತಿದ್ದಾಗ ಪ್ರತಿ ತಿಂಗಳು ಗವಿಮಠದ ೧೫ನೇ ಪೀಠಾಧಿಪತಿಗಳು ಶ್ರೀಮಠದ ಬಗ್ಗೆ ಕಾಗದ ಬರೆಯುತ್ತಾ ಇಲ್ಲಿಯ ಎಲ್ಲಾ ಇತಿವೃತ್ತಗಳನ್ನು ತಿಳಿಸುತ್ತಾ ಹಣವನ್ನು ಸಹ ಕಳಿಸುತ್ತಿದ್ದರು.ಸುಮಾರು ದಶಕಗಳ ಕಾಶಿಯಲ್ಲಿದ್ದು ಅಧ್ಯಯನ ಮಾಡುತ್ತಿರುವಷ್ಟು ಕಾಲದಲ್ಲಿ ಶಿವಶಾಂತ ಶಿವಯೋಗಿಗಳು (ಗಡ್ಡದಜ್ಜನವರು) ಗವಿಮಠದ ಎಲ್ಲಾ ವಿವರಗಳನ್ನು ತಿಳಿಸುತ್ತಿದ್ದರಲ್ಲದೆ, ಮುಂದೆ ನೀವೇ ಈ ಮಠದ ಉತ್ತರಾಧಿಕಾರಿಗಳು ಎನ್ನುವ ರೀತಿಯಲ್ಲಿ ಕಾಗದಗಳನ್ನು ಬರೆಯುತ್ತಿದ್ದರು ಹಾಗೆಯೇ ತಮ್ಮ ಅಂತ್ಯಾವಸ್ಥೆಯಲ್ಲಿಯೂ ಸಹಿತ ಗವಿಮಠದ ಉತ್ತರಾಧಿಕಾರಿಗಳು “ಮರಿಶಾಂತವೀರ ಮಹಾಸ್ವಾಮಿ”ಗಳಾಗಬೇಕೆಂದು ಪಂಚರ ಸಮಕ್ಷಮ “ಉಯಿಲ್”ನ್ನು ಬರೆಯಿಸಿದ್ದರು. ಸದುವಿನಯ ವಿದ್ಯಾಪಕ್ಷಿಪಾತಿಗಳಾಗಿದ್ದ ಜ|| ಶಿವಶಾಂತವೀರ ಮಹಾಸ್ವಾಮಿಗಳವರು ಬಳ್ಳಾರಿಯ ಅಖಿಲಭಾರತ ವೀರಶೈವ ಮಹಾಸಭೆಯಲ್ಲಿ ಕಂಡ ವಿನಯಶಾಲಿ ವಿದ್ಯಾರ್ಥಿ ಗುರುನಂಜಯ್ಯ (ಮರಿಶಾಂತವೀರ ಮಹಾಸ್ವಾಮಿಗಳು) ನಡೆ-ನುಡಿಗಳನ್ನು ಮೆಚ್ಚಿಕೊಂಡು ಈತನ ಮೇಲೆ ಅಪಾರ ಕರುಣೆಯನ್ನು ಬೀರಿದರು.ಗುರುನಂಜಯ್ಯ ೧೯೧೩ ರಿಂದ ಸುಮಾರು ದಶಕಗಳ ಕಾಲ ಕಾಶಿಯಲ್ಲಿದ್ದು ಸಂಸ್ಕೃತಾಧ್ಯಯನ ಗೈದು ಸ್ವಗ್ರಾಮ ಸೂಡಿಗೆ ಮರಳಿದರು. ಹಾಗೆಯೇ ಇತ್ತಕಡೆ ಅಂದರೆ ಕೊಪ್ಪಳ ಗವಿಮಠದ ೧೫ನೇ ಪೀಠಾಧಿಪತಿಗಳಾಗಿದ್ದ ಜ|| ಶಿವಶಾಂತವೀರ ಮಹಾಸ್ವಾಮಿಗಳವರು(ಗಡ್ಡದಜ್ಜನವರು) ಶಿವಾಧೀನರಾಗಿದ್ದರು. ಈ ಮೊದಲೇ ಪೂಜ್ಯರು ಬರೆಯಿಸಿಟ್ಟಿದ್ದ ಉಯಿಲಿನ ಪ್ರಕಾರ ಕೊಪ್ಪಳ ಗವಿಮಠದ ಭಕ್ತರು ಸೂಡಿಗೆ ಬಂದು ಜ|| ಶಿವಶಾಂತವೀರ ಮಹಾಸ್ವಾಮಿಗಳವರ ಸತ್ಯ ಸಂಕಲ್ಪ ಹಾಗೂ ಬರೆಯಿಸಿಟ್ಟಿದ್ದ ಉಯಿಲಿನ ಮಾಹಿತಿಯನ್ನು ಸೂಡಿಯ ಪ್ರಮುಖರಿಗೂ, ಗುರುನಂಜಯ್ಯನವರ ತಂದೆ-ತಾಯಿಗಳಿಗೆ ತಿಳಿಸಿದ ನಂತರ ಗುರುನಂಜಯ್ಯ ಎಲ್ಲ ಹಿರಿಯರ ಅಪ್ಪಣೆ ಆಶೀರ್ವಾದ ಪಡೆದುಕೊಂಡು ಶಾಲಿವಾಹನ ಶಕೆ ೧೮೪೪ನೆಯ ದುಂದುಭಿನಾಮ ಸಂವತ್ಸರದ ಮಾರ್ಗಶಿರ ಬಹುಳ ದಶಮಿ ಬುಧವಾರ (ತಾ. ೧೩.೧೨.೧೯೨೨) ಶ್ರೀ ಮ.ನಿ.ಪ್ರ.ಜ. ಮರಿಶಾಂತವೀರ ಮಹಾಸ್ವಾಮಿಗಳೆಂಬ ಅಭಿನಾಮದಿಂದ ಶ್ರೀಗವಿಮಠದ ಪೀಠಾಧಿಕಾರವನ್ನು ಸ್ವಿಕಾರ ಮಾಡಿದರು.
ವ್ಯಕ್ತಿತ್ವ
ಲಿಂ. ಮರಿಶಾಂತವೀರ ಮಹಾಸ್ವಾಮಿಗಳವರು ಹಿತ-ಮಿತ ಭಾಷಿಗಳಾಗಿದ್ದರು. ಸದಾ ಲಿಂಗಪೂಜೆಯಲ್ಲಿಯೇ ನಿರತರಾಗಿರುತ್ತಿದ್ದರು. ಮಹಾತಪಸ್ವಿಗಳಾಗಿ, ಶಿವಾನುಭವಿಗಳಾಗಿ ತ್ರಿವಿಧ ದಾಸೋಹ ಮೂರ್ತಿಗಳಾಗಿ ಶ್ರೀಗವಿಮಠದ ಹೆಸರನ್ನು ಬಹು ಎತ್ತರಕ್ಕೇರಿಸಿದ್ದಾರೆ. ಸ್ವತಃ ವಿದ್ಯಾವಂತರು ಆಗಿದ್ದರು. ಆಯುರ್ವೇದದಲ್ಲಿ ಅಪಾರ ಪಾಂಡಿತ್ಯ ಹೊಂದಿದ ಪೂಜ್ಯರು ಈ ನಾಡಿನಲ್ಲಿ ಸಹಸ್ರಾರು ಜನ ಆಯುರ್ವೇದ ವೈದ್ಯರನ್ನು ಸಮಾಜಕ್ಕೆ ನೀಡಿದ್ದಾರೆ. ಭಕ್ತರ ನಾಡಿ ಹಿಡಿದು ರೋಗಗಳನ್ನು ಪರೀಕ್ಷಿಸಿ ಆಯುರ್ವೇದದ ಚಿಕಿತ್ಸೆ ನೀಡಿ ರೋಗಿಗಳನ್ನು ಗುಣಪಡಿಸುತ್ತಿದ್ದ ಕೀರ್ತಿ ಪೂಜ್ಯರಿಗಿದೆ. ಇಷ್ಟೊಂದು ಸಾಧನೆಯ ಪುಜ್ಯ ಲಿಂ.ಮರಿಶಾAತವೀರ ಮಹಾಶಿವಯೋಗಿಗಳು ೦೧-೦೭-೧೯೬೭ ರಂದು ಲಿಂಗೈಕ್ಯರಾದರು . ಈ ದಿನ ಅವರ ನೆನಹು ನಮ್ಮ ಪಾಲಿಗೆ ಪುಣ್ಯ.

Please follow and like us:
error

Related posts