ಸಾಹಿತಿಗಳು ಹೆದರಬೇಕಿಲ್ಲ: ನಾರಾಯಣಗೌಡ

ಸಾಹಿತಿಗಳು, ಕಲಾವಿದರು, ಪತ್ರಕರ್ತರು ಸರ್ಕಾರದ ವಿರುದ್ಧ, ವ್ಯವಸ್ಥೆಯ ವಿರುದ್ಧ‌ ಧ್ವನಿ ಎತ್ತಲು ಬೆದರುವ, ಹಿಂಜರಿಯುವ ಅಗತ್ಯವಿಲ್ಲ. ಕರ್ನಾಟಕ ರಕ್ಷಣಾ ವೇದಿಕೆ ನಿಮ್ಮೊಂದಿಗೆ ಇರುತ್ತದೆ. ಬೆದರಿಸುವ ಶಕ್ತಿಗಳನ್ನು ಎದುರಿಸುವ ಶಕ್ತಿ ಕರ್ನಾಟಕ ರಕ್ಷಣಾ ವೇದಿಕೆಗೆ ಇದೆ. ಸಾಹಿತಿಗಳು ಮುಕ್ತವಾಗಿ ತಮ್ಮ ಅಭಿಪ್ರಾಯಗಳನ್ನು ಹೇಳಲು ಸ್ವತಂತ್ರರು, ಅವರ ಹಕ್ಕನ್ನು ಕಿತ್ತುಕೊಳ್ಳುವ ಹಕ್ಕು ಯಾರಿಗೂ ಇಲ್ಲ ಎಂದು ಕರ್ನಾಟಕ ರಕ್ಷಣಾ ವೇದಿಕೆ ರಾಜ್ಯಾಧ್ಯಕ್ಷ ಟಿ.ಎ.ನಾರಾಯಣಗೌಡ ಅಭಿಪ್ರಾಯಪಟ್ಟಿದ್ದಾರೆ.

ಹಿರಿಯ ಸಾಹಿತಿ ಹಂಪನಾ ಅವರನ್ನು ಕ್ಷುಲ್ಲಕ ದೂರೊಂದರ ಹಿನ್ನೆಲೆಯಲ್ಲಿ ಪೊಲೀಸ್ ಠಾಣೆಗೆ ಕರೆಸಿ ಅವಮಾನಿಸಿ ಪ್ರಕರಣ‌ ವಿರೋಧಿಸಿ ಕರ್ನಾಟಕ‌ ರಕ್ಷಣಾ ವೇದಿಕೆ ಇಂದು ಸಂಜೆ ಬೆಂಗಳೂರಿನ ಗಾಂಧಿನಗರದಲ್ಲಿ ಏರ್ಪಡಿಸಿದ್ದ ಖಂಡನಾ ಸಭೆಯ ಅಧ್ಯಕ್ಷತೆಯನ್ನು ವಹಿಸಿ ಅವರು ಮಾತನಾಡಿದರು.

ಹಂಪನಾ ಅವರ ಮೇಲೆ ನಡೆದಿರುವುದು ‘ಮಾನಸಿಕ ಭಯೋತ್ಪಾದನೆ’ ಎಂದು ಬಣ್ಣಿಸಿದ ಅವರು, ಇದನ್ನು ಕನ್ನಡಿಗರು ಸಹಿಸುವುದಿಲ್ಲ. ಯಾರು ಈ ಘಟನೆಗೆ ಕಾರಣಕರ್ತರೋ ಅವರಿಗೆ ಶಿಕ್ಷೆಯಾಗಬೇಕು. ಇಂಥ ಘಟನೆಗಳು ಮುಂದೆ ನಡೆಯದಂತೆ ಎಚ್ಚರ ವಹಿಸಬೇಕು ಎಂದು ಆಗ್ರಹಿಸಿದರು.

ಎಂದೂ ಯಾರ ಮನಸ್ಸನ್ನೂ ನೋಯಿಸುವಂತೆ ಮಾತನಾಡದ ಹಂಪನಾ ಅವರು ಮಂಡ್ಯ ತಾಲ್ಲೂಕು ಸಾಹಿತ್ಯ ಸಮ್ಮೇಳನದಲ್ಲಿ ರೈತರ ಪರವಾಗಿ ಮಾತನಾಡಿದ್ದೇ ತಪ್ಪಾಗಿಹೋಯಿತೇ? ತಮ್ಮ ಪಾಡಿಗೆ ತಾವು ಸಾಹಿತ್ಯ-ಸಂಶೋಧನೆಯಲ್ಲಿ ತೊಡಗಿರುವ ಹಂಪನಾ ಅವರೂ ಸರ್ಕಾರವನ್ನು ಟೀಕಿಸಿ ಮಾತನಾಡಿದ್ದಾರೆಂದರೆ ಪರಿಸ್ಥಿತಿಯ ಗಾಂಭೀರ್ಯತೆಯನ್ನು ಸರ್ಕಾರ ಮನಗಾಣಬೇಕಿತ್ತು. ದೆಹಲಿಯಲ್ಲಿ ನಡೆಯುತ್ತಿರುವ ರೈತರ ಹೋರಾಟ ಇಡೀ ದೇಶದ ಜನರನ್ನು ಸೆಳೆದಿದೆ, ಹೀಗಾಗಿಯೇ ಹಂಪನಾ ಮಾತನಾಡಿದ್ದಾರೆ ಎಂದರು.

ಹಿರಿಯ ಸಾಹಿತಿ ಕುಂ.ವೀರಭದ್ರಪ್ಪ ಅವರು ಮಾತನಾಡಿ, ಹಂಪನಾ‌ ಮೃದುಮಾತಿನ ಸಜ್ಜನ ಸಾಹಿತಿ. ಅವರು ಅಂತಾರಾಷ್ಟ್ರೀಯ ಖ್ಯಾತಿಯ ಸಂಶೋಧಕರು. ಅವರನ್ನು ಠಾಣೆಗೆ ಕರೆದಾಗ ಅವರು ಹೋಗಬಾರದಿತ್ತು, ವಾರಂಟ್ ತಂದು ಬಂಧಿಸಿ ಎಂದು‌ ಸವಾಲು ಹಾಕಬೇಕಿತ್ತು ಎಂದು ಅಭಿಪ್ರಾಯಪಟ್ಟರು.

ಪ್ರಭುತ್ವದ ವಿರುದ್ಧ ಸಾಹಿತಿಗಳು ಮಾತನಾಡುವುದು ಹೊಸದೇನೂ ಅಲ್ಲ. ಕನ್ನಡ ಪರಂಪರೆಯಲ್ಲಿ ಪಂಪ, ರನ್ನ, ರಾಘವಾಂಕ, ಕುಮಾರವ್ಯಾಸರಿಂದ ಹಿಡಿದು ಎಲ್ಲರೂ ಜನರ ಪರವಾಗಿ ಮಾತನಾಡಿದವರೇ ಆಗಿದ್ದಾರೆ. ಇಷ್ಟು ಸಣ್ಣ ಸೂಕ್ಷ್ಮ ಗೊತ್ತಿಲ್ಲದ ಸರ್ಕಾರ ಸಾಹಿತಿಗಳನ್ನು ಬೆದರಿಸುವ ತಂತ್ರಕ್ಕೆ ಕೈ ಹಾಕಿದೆ ಎಂದರು.

ಹಿಂದುಳಿದ ವರ್ಗಗಳ ಆಯೋಗದ ಮಾಜಿ ಅಧ್ಯಕ್ಷ ಡಾ.ಸಿ.ಎಸ್.ದ್ವಾರಕಾನಾಥ್ ಮಾತನಾಡಿ, ಇತ್ತೀಚಿನ ದಿನಗಳಲ್ಲಿ ಕನ್ನಡ ಅಸ್ಮಿತೆಯ ಮೇಲೆ ದಾಳಿಗಳು ಹೆಚ್ಚಾಗುತ್ತಲೇ ಇದೆ. ಇದರ ಮೂಲ ನಾಗಪುರದಲ್ಲಿದೆ. ಅಲ್ಲಿ ಹುಟ್ಟುವ ಅಜೆಂಡಾಗಳನ್ನು ಕರ್ನಾಟಕದ ಮೇಲೆ ಜಾರಿ‌ ಮಾಡಲಾಗುತ್ತಿದೆ. ತಮಿಳುನಾಡು,ಕೇರಳದಲ್ಲಿ ಅವರಿಗೆ ಸಾಧ್ಯವಾಗದೇ ಇರುವುದು ಕರ್ನಾಟಕದಲ್ಲಿ ಸಾಧ್ಯವಾಗಿದೆ. ನಾವು ಎಚ್ಚೆತ್ತುಕೊಳ್ಳಬೇಕಿದೆ ಎಂದು ಹೇಳಿದರು.

ದೇಶದಲ್ಲಿ ಒಂದೇ ರಾಷ್ಟ್ರೀಯತೆ ಇಲ್ಲ. ಹಲವು ರಾಷ್ಟ್ರೀಯತೆಗಳು ಇವೆ. ಒಂದು ಧರ್ಮ, ಒಂದು ಸಂಸ್ಕೃತಿ, ಒಂದು ಭಾಷೆ ಹೇರುವ ಹುನ್ನಾರಗಳನ್ನು ನಾವು ವಿಫಲಗೊಳಿಸಬೇಕು. ಒಬ್ಬ ಕನ್ನಡ ಸಾಹಿತಿಯನ್ನು ಯಾವ ಹುರುಳೂ ಇಲ್ಲದ ದೂರೊಂದರ ಹಿನ್ನೆಲೆಯಲ್ಲಿ ಪೊಲೀಸ್ ಠಾಣೆಗೆ ಕರೆಯಿಸುವ ಹಿಂದಿನ ದುಷ್ಟತನವನ್ನು ನಾವು ಅರ್ಥ ಮಾಡಿಕೊಳ್ಳಬೇಕು ಎಂದರು.

ಚಿಂತಕ ನಾಗೇಗೌಡ ಕೀಲಾರ ಶಿವಲಿಂಗಯ್ಯ ಮಾತನಾಡಿ, ಸಂವಿಧಾನದ 19ನೇ ವಿಧಿ ದೇಶದ ಎಲ್ಲ ನಾಗರಿಕರಿಗೂ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ನೀಡುತ್ತದೆ. ಆದರೆ ಇದನ್ನು ನೆಹರೂ ಅವರ ಕಾಲದಲ್ಲೇ ತಿದ್ದುಪಡಿ ತಂದು ದುರ್ಬಲಗೊಳಿಸಲಾಯಿತು. ನಾವು ತಿದ್ದುಪಡಿಗೂ ಮುನ್ನ ಇದ್ದ ಹಕ್ಕನ್ನೇ ಪಡೆಯಲು ಹೋರಾಟ ಮಾಡಬೇಕು ಎಂದರು.

ಮತ್ತೋರ್ವ ಚಿಂತಕ ಡಾ.ಸಿ.ಜಿ.ಲಕ್ಷ್ಮಿಪತಿ ಮಾತನಾಡಿ, ಹಂಪನಾ ಅವರಿಗಾದ ಅಪಮಾನದಂಥದ್ದೇ ಘಟನೆಗಳು ದೇಶದಾದ್ಯಂತ ನಡೆಯುತ್ತಿವೆ. ಕನ್ನಡದ ಅಸ್ಮಿತೆಯನ್ನು ಕೆಣಕುವ ಕೆಲಸ ಪದೇಪದೇ ನಡೆಯುತ್ತಿದೆ. ಈ ವಿಷದ ಮೂಲ ಇರುವುದು ಗೋಲ್ವಾಲ್ಕರ್ ಅವರ ‘ಬಂಚ್ ಆಫ್ ಥಾಟ್ಸ್’ ಪುಸ್ತಕದಲ್ಲಿ. ಅಖಂಡ ಭಾರತಕ್ಕೆ ಇರುವ ತೊಡಕುಗಳಲ್ಲಿ ಅವರು ‘ಪ್ರಾದೇಶಿಕ ಭಾಷೆ’ಗಳನ್ನೂ ಗುರುತಿಸಿದ್ದಾರೆ. ಆರ್ ಎಸ್ ಎಸ್ ಪ್ರತಿಪಾದಿಸುವ ರಾಷ್ಟ್ರೀಯತೆಯಲ್ಲಿ ಕನ್ನಡ ಮತ್ತು ಕನ್ನಡದಂಥ ಭಾಷೆಗಳಿಗೆ ಸ್ಥಾನವೇ ಇಲ್ಲ ಎಂದು ಹೇಳಿದರು.

ಮಾಜಿ ಸಚಿವೆ ಬಿ.ಟಿ.ಲಲಿತಾ ನಾಯಕ್, ಹಿರಿಯ ಸಾಹಿತಿ ಎಲ್.ಎನ್.ಮುಕುಂದರಾಜ್, ಚಲನಚಿತ್ರ ನಿರ್ದೇಶಕ, ನಟ ಬಿ‌.ಸುರೇಶ್, ಹಿರಿಯ ಪತ್ರಕರ್ತ ಬೆಳಗೂರು ಸಮೀಯುಲ್ಲಾ, ಕವಿಗಳಾದ ಹುಲಿಕುಂಟೆ ಮೂರ್ತಿ, ಗಿರೀಶ್ ಹಂದಲಗೆರೆ, ಬೆಂಗಳೂರು ನಗರ ಕಸಾಪ ಮಾಜಿ ಅಧ್ಯಕ್ಷ ಶ್ರ.ದೇ.ಪಾರ್ಶ್ವನಾಥ್, ಅಖಿಲ ಕರ್ನಾಟಕ ಮಹಮದೀಯರ ಕನ್ನಡ ಸಂಘದ ಅಧ್ಯಕ್ಷ ಸಮೀಯುಲ್ಲಾ ಖಾನ್, ಕರವೇ ರಾಜ್ಯ ಪ್ರಧಾನ ಕಾರ್ಯದರ್ಶಿ ಬಿ.ಸಣ್ಣೀರಪ್ಪ, ಮಹಿಳಾ ಘಟಕದ ಉಪಾಧ್ಯಕ್ಷೆ ಅಶ್ವಿನಿ ಗೌಡ, ಸದ್ಭಾವನಾ ಪ್ರಕಾಶನದ ಪ್ರಕಾಶ್ ಮೂರ್ತಿ ಮತ್ತಿತರರು ಪಾಲ್ಗೊಂಡಿದ್ದರು.

ದಿನೇಶ್ ಕುಮಾರ್ ಎಸ್.ಸಿ. ಸ್ವಾಗತಿಸಿ, ಶಿವಾನಂದ ಗುಂಡಾನವರ್ ನಿರೂಪಿಸಿದರು.

Please follow and like us:
error