fbpx

ಸೋಂಕು ಹರಡುತ್ತಿದೆ ಈಗೇನು ಮಾಡಬೇಕು ? ಡಾ.ಶ್ರೀನಿವಾಸ ಕಕ್ಕಿಲಾಯ

ಕೊರೋನಾ ಸೋಂಕು, ನಿರೀಕ್ಷಿಸಿದ್ದಂತೆಯೇ, ಹರಡುತ್ತಲೇ ಇದೆ. ಗಂಟಲಿನ ಸ್ರಾವವನ್ನು ಪರೀಕ್ಷೆಗೆ ಕಳುಹಿಸಿ, ವರದಿ ಪಾಸಿಟಿವ್ ಎಂದಾದರೆ ಮನೆಯನ್ನು ಪರೀಕ್ಷಿಸಿ, ಅದು ಸಣ್ಣದು ಎಂದಾದರೆ ಅವರನ್ನು ಕೊರೊನಾ ಆರೈಕೆ ಕೇಂದ್ರ (ಸಿಸಿಸಿ) ಎಂಬ ಚಪ್ಪರದೊಳಗೆ ತುಂಬಿಸುವ ವ್ಯವಸ್ಥೆಯನ್ನು ಮಾಡಲಾಗಿದೆ. ಇದರಿಂದ ಯಾವ ಉಪಯೋಗವೂ ಇಲ್ಲ, ಬಡ ಮಧ್ಯಮ ವರ್ಗಗಳವರನ್ನು ಹೊರಗೆ ತಂದು ಇಲ್ಲಿಟ್ಟು, ಶ್ರೀಮಂತರಿಗೆ ಮನೆಯಲ್ಲೇ ಉಳಿಯಲು ಬಿಡುವ ಪ್ಲಾನ್ ಅದು ಅಂತ ವಾರ್ತಾಭಾರತಿಯಲ್ಲಿ ಬರೆದಿದ್ದೆವು, ಸರಕಾರಕ್ಕೂ ಹೇಳಿದ್ದೆ. ಅದು ನಿಜವಾಗಲು ಹೆಚ್ಚು ದಿನ ಬೇಕಾಗಲಿಲ್ಲ.

ಈಗ ಎಲ್ಲರ ಮನೆಗಳಲ್ಲೂ ಕೊರೋನಾ ಹೊಕ್ಕುತ್ತಿರುವಾಗ ಈ ದಿಗ್ಬಂಧನದಿಂದ ಆಹಾರ, ಆರೋಗ್ಯ ಸೇವೆ ಇತ್ಯಾದಿಗಳಿಗೆ ಇನ್ನಷ್ಟು ಸಮಸ್ಯೆಗಳೇ ಆಗಲಿವೆ. ಸೋಂಕನ್ನು ತಡೆಯಲು ಅದರಿಂದ ಯಾವ ಪ್ರಯೋಜನವೂ ಆಗುವುದಿಲ್ಲ.

ಈಗಿರುವ ಸಮಸ್ಯೆಗಳು ಹೀಗಿವೆ:

ಕೊರೋನಾ ಸೋಂಕು ಹರಡುತ್ತಿದೆ, ಮುಂದಿನ 2 ತಿಂಗಳಲ್ಲಿ ಊರಿನ 30-50% ಜನರನ್ನು ಬಾಧಿಸಲಿದೆ. ಅವರಲ್ಲಿ 99%ಕ್ಕೂ ಹೆಚ್ಚು ಸೋಂಕಿತರು ಯಾವ ಚಿಕಿತ್ಸೆಯ ಅಗತ್ಯವೂ ಇಲ್ಲದೆ ಗುಣಮುಖರಾಗಲಿದ್ದಾರೆ, ಆದ್ದರಿಂದ ಅವರೆಲ್ಲರೂ ತಮ್ಮ ತಮ್ಮ ಮನೆಗಳಲ್ಲೇ ಇದ್ದು ಆರೈಕೆ ಮಾಡಿಕೊಳ್ಳಬಹುದು.

ಆದರೆ ಹೀಗೆ ಮನೆಗಳಲ್ಲೇ ಉಳಿದು ಹುಷಾರಾಗುವುದಕ್ಕೂ ಅಡ್ಡಿಗಳನ್ನು ಸೃಷ್ಟಿಸಲಾಗಿದೆ. ಕಳೆದ 4 ತಿಂಗಳಲ್ಲಿ ಕೊರೋನಾ ಬಗ್ಗೆ ಭಯಂಕರ ಭೀತಿಯನ್ನು ಹುಟ್ಟಿಸಲಾಗಿರುವುದರಿಂದ ಸಹಜವಾಗಿಯೇ ಎಲ್ಲರಲ್ಲೂ ಆತಂಕಗಳಿವೆ. ಸರಕಾರವೂ ಕೂಡ ಈ ಕ್ಷಣದವರೆಗೂ ಈ ಬಗ್ಗೆ ಯಾವುದೇ ಸ್ಪಷ್ಟ ನಿಲುವನ್ನು ತಾಳದೇ ಇರುವುದರಿಂದ ಆಡಳಿತದಲ್ಲೂ, ಜನರಲ್ಲೂ ಗೊಂದಲಗಳಿವೆ. ಸೋಂಕಿನ ಲಕ್ಷಣಗಳು ಕಂಡುಬಂದರೆ ಮನೆಯಲ್ಲೇ ಇದ್ದು ಸಹಾಯವಾಣಿಗೆ ಕರೆ ಮಾಡಿದರೆ ಸಾಕು ಎನ್ನುವುದನ್ನು ಸರಕಾರವು ಮೊದಲಿನಿಂದಲೇ ಹೇಳಬೇಕಾಗಿತ್ತು; ಅದರ ಬದಲಿಗೆ ಜ್ವರ ತಪಾಸಣಾ ಕೇಂದ್ರಗಳಲ್ಲಿ ಕೊರೋನಾ ಪತ್ತೆಯ ಪರೀಕ್ಷೆ ಮಾಡಿಸಿಕೊಳ್ಳಿ ಎಂದೇ ಹೇಳಲಾಯಿತು. ಜ್ವರ ತಪಾಸಣಾ ಕ್ಲಿನಿಕ್ ಬೇಡ, ಮನೆಗಳಿಗೆ ಭೇಟಿ ನೀಡುವ ಸಂಚಾರಿ ಘಟಕಗಳನ್ನು ಮಾಡಿ ಎಂದು ಎರಡೂವರೆ ತಿಂಗಳ ಹಿಂದೆಯೇ ಎಚ್ಚರಿಸಿದ್ದರೂ ಸರಕಾರವು ಅದನ್ನು ಕಡೆಗಣಿಸಿತು. ಈಗ ಸೋಂಕಿನ ಲಕ್ಷಣಗಳಿರುವವರು ಈ ಜ್ವರ ತಪಾಸಣಾ ಕೇಂದ್ರಗಳನ್ನು ಹುಡುಕಿಕೊಂಡು ಅಲೆದಾಡಿ ಎಲ್ಲೆಡೆ ಸೋಂಕು ಇನ್ನಷ್ಟು ಹರಡುವುದಕ್ಕೆ ಕಾರಣವಾಗುತ್ತಿದೆ, ಜೊತೆಗೆ ವರದಿಗಳು ತಡವಾಗುವುದು, ಒಬ್ಬರದು ಬಂದರೆ ಇನ್ನೊಬ್ಬರದು ಬಾರದಿರುವುದು ಎಂಬೆಲ್ಲಾ ಸಮಸ್ಯೆಗಳೂ ಆಗುತ್ತಿವೆ.

ಸೋಂಕಿನ ಲಕ್ಷಣಗಳಿದ್ದು ಕರೆಯನ್ನಷ್ಟೇ ಮಾಡಿದವರು, ಪತ್ತೆಯ ಪರೀಕ್ಷೆ ಮಾಡಿಸಿಕೊಳ್ಳದವರು, ಸೋಂಕು ಪತ್ತೆಯ ಪರೀಕ್ಷೆ ಮಾಡಿಸಿಕೊಂಡು ಪಾಸಿಟಿವ್ ಆದವರು, ಯಾರೇ ಆದರೂ, ಅನ್ಯ ಸಮಸ್ಯೆಗಳಿಲ್ಲದಿದ್ದರೆ, ತಮ್ಮ ತಮ್ಮ ಮನೆಗಳಲ್ಲೇ ಉಳಿಯಲು ಅವಕಾಶ ನೀಡಬೇಕಿತ್ತು. ಅದಕ್ಕೂ ಅಡ್ಡಿಗಳನ್ನು ಹೇರಲಾಯಿತು. ಮನೆಗಳನ್ನು ಸರಕಾರಿ ಅಧಿಕಾರಿಗಳು ಪರಿಶೀಲಿಸಬೇಕು, ಮನೆ ದೊಡ್ಡದಿದ್ದರೆ, ನೋಡಿಕೊಳ್ಳಲು ಜನರಿದ್ದರೆ ಮಾತ್ರ ಹಾಗೆ ಉಳಿಯಲು ಬಿಡುತ್ತೇವೆ, ಇಲ್ಲದಿದ್ದರೆ ಸಿಸಿಸಿಗೆ ಸೇರಿಸಲಾಗುವುದು ಎಂದು ಹೇಳಲಾಯಿತು. ಅದಾದ ಮರುಬೆಳಗ್ಗೆಯೇ ಅದರ ಸಮಸ್ಯೆಗಳ ಬಗ್ಗೆ ಬರೆದಿದ್ದೆವು, ಇದು ವಿಫಲವಾಗುತ್ತಿದೆ ಎಂದು ನೇರವಾಗಿ ಅಧಿಕಾರಿಗಳಿಗೆ ಹೇಳಿದ್ದೆ. ಈಗ ಅತ್ತ ಮನೆಯೂ ಇಲ್ಲ, ಇತ್ತ ಸಿಸಿಸಿಯೂ ಇಲ್ಲ ಎಂಬಂತಾಗಿದೆ.

ಸೋಂಕಿರುವವರನ್ನು ತಮ್ಮದೇ ಸಣ್ಣ ಮನೆಗಳಲ್ಲಿ ಉಳಿಯಲು ಬಿಟ್ಟರೆ ಮನೆಯ ಇತರರಿಗೆ ಸೋಂಕು ಹರಡುವರೆಂಬ ಕಾರಣಕ್ಕೆ ಅವರನ್ನು ಪ್ರತ್ಯೇಕಿಸಿ ಸಿಸಿಸಿಗೆ ಹೊತ್ತೊಯ್ಯುವ ಯೋಜನೆಯೇ ಅವೈಜ್ಞಾನಿಕವಾದದ್ದು. ಮನೆಯ ಒಬ್ಬರಲ್ಲಿ ಸೋಂಕಿನ ಲಕ್ಷಣಗಳು ಆರಂಭಗೊಳ್ಳುವಾಗಲೇ ಅದು ಮನೆಯೊಳಗೆ ಇತರರಿಗೆ ಹರಡಲಾರಂಭಿಸಿರುತ್ತದೆ, ಆ ಮೇಲೆ ಅವರ ಪರೀಕ್ಷೆಯ ಫಲಿತಾಂಶ ಬರುವ ವೇಳೆಗೆ ಮತ್ತಷ್ಟು ಹರಡಿರುತ್ತದೆ. ಮನೆ ದೊಡ್ಡ ಬಂಗಲೆಯಿರಲಿ, ಸಣ್ಣದಿರಲಿ, ಮನೆಯೊಳಗೆ ಸೋಂಕು ಹರಡದಂತೆ ಮಾಡುವುದು ಸುಲಭವಿಲ್ಲ. ಆದ್ದರಿಂದಲೇ, ಸೋಂಕಿನಿಂದ ಅಪಾಯಕ್ಕೊಳಗಾಗಬಲ್ಲವರು ಇತರರೊಂದಿಗೆ ಜೊತೆಯಾಗಿ ಬಾಳುತ್ತಿದ್ದರೆ, ಸೋಂಕು ಹರಡಲಾರಂಭಿಸುವ ಮೊದಲೇ ಪ್ರತ್ಯೇಕವಾಗಿ, ಸಂಪೂರ್ಣ ಸುರಕ್ಷಿತವಾಗಿ ಉಳಿಯುವ ವ್ಯವಸ್ಥೆಗಳನ್ನು ಮಾಡಿಕೊಳ್ಳುವುದು ಒಳ್ಳೆಯದು ಎಂದು ಮಾರ್ಚ್ ಮೊದಲಿಗೆ ಹೇಳಿದ್ದೆ, ಸವಿವರವಾದ ಕಾರ್ಯಯೋಜನೆಯನ್ನು ಮಾರ್ಚ್ 23ರಂದೇ ಸಲ್ಲಿಸಿದ್ದೆ, ಪತ್ರಿಕೆಗಳಲ್ಲೂ ಅದು ಪ್ರಕಟವಾಗಿತ್ತು. ಅದನ್ನೂ ಮಾಡಲಿಲ್ಲ.

ಈಗ ಸೋಂಕು ಎಲ್ಲೆಡೆ ಇದೆ, ಜನರು ಪರೀಕ್ಷೆ-ಚಿಕಿತ್ಸೆ ಎಂದು ಸುತ್ತುತ್ತಿದ್ದಾರೆ, ಸಿಸಿಸಿಯಿಂದ ಉಪಯೋಗವಿಲ್ಲ, ಮನೆಯಲ್ಲೇ ಉಳಿದವರನ್ನು ಪರೀಕ್ಷಿಸಿ ಆತಂಕ ನಿವಾರಿಸುವ ವ್ಯವಸ್ಥೆಯೂ ಇಲ್ಲ, ಎಲ್ಲರೂ ಹೆದರಿ ಆಸ್ಪತ್ರೆಗಳಿಗೆ ದಾಖಲಾಗಲು ಯತ್ನಿಸಿದರೆ ಅಲ್ಲಿ ಸ್ಥಳವಿಲ್ಲ, ಹೀಗಾದರೆ ನಿಜಕ್ಕೂ ಅದರ ಅಗತ್ಯವಿದ್ದವರಿಗೆ ಇನ್ನಷ್ಟು ಕಷ್ಟವೇ ಆಗಲಿದೆ.

ಇದಕ್ಕಿರುವ ಪರಿಹಾರ ಇಷ್ಟೇ:

ಎಲ್ಲರಲ್ಲೂ ಧೈರ್ಯ ತುಂಬಿ ಮನೆಯಲ್ಲೇ ಉಳಿಯುವಂತೆ ಹೇಳುವುದು – ಎಲ್ಲಾ ಮಾಧ್ಯಮಗಳು ಇದೇ ಕೆಲಸವನ್ನು ದಯವಿಟ್ಟು ಮಾಡಬೇಕು.

ಮನೆಯಲ್ಲೇ ಉಳಿದವರ ಆತಂಕವನ್ನು ತೊಲಗಿಸುವುದಕ್ಕೂ, ಅವರಲ್ಲಿ ಸಮಸ್ಯೆಗೀಡಾಗಬಲ್ಲವರನ್ನು ಮೊದಲೇ ಗುರುತಿಸುವುದಕ್ಕೂ ಸಂಚಾರಿ ಘಟಕಗಳ ವ್ಯವಸ್ಥೆ ಮಾಡುವುದು. ಈ ಘಟಕಗಳವರು ಪಲ್ಸ್ ಆಕ್ಸಿಮೀಟರ್ ಬಳಸಿ ಸೋಂಕಿತರ ರಕ್ತದ ಆಮ್ಲಜನಕವನ್ನು ಅಳೆದು ತೋರಿಸಿ ಧೈರ್ಯ ತುಂಬುವುದು, ಅದು 95% ಗಿಂತ ಕಡಿಮೆಯಿದ್ದರೆ ಆಸ್ಪತ್ರೆಗೆ ದಾಖಲಿಸುವುದು.

ಸರ್ಕಾರವು 24-48 ಗಂಟೆಗಳಲ್ಲಿ ಈ ವ್ಯವಸ್ಥೆಯನ್ನು ಮಾಡಲಾಗದಿದ್ದರೆ, ಅಥವಾ ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ, ಜನರೇ ತಮ್ಮ ತಂಡಗಳನ್ನು ಕಟ್ಟಿ, ಅಗತ್ಯವಿದ್ದವರ ಮನೆಗಳಿಗೆ ಹೋಗಿ ಪಲ್ಸ್ ಆಕ್ಸಿಮೀಟರ್ ಬಳಸಿ, ಪರೀಕ್ಷಿಸಿ, ಧೈರ್ಯ ಹೇಳುವ ಕೆಲಸ ಮಾಡುವುದು. ಸಾಧ್ಯವಿರುವವರು ತಾವಾಗಿ ಅದನ್ನು ಖರೀದಿಸಲಿ, ಉಳಿದವರಿಗೆ ಇಂಥ ತಂಡಗಳು ನೆರವಾಗಲಿ. ಈ ಉಪಕರಣಕ್ಕೆ ಒಂದಿಷ್ಟು ವೆಚ್ಚವಾದರೂ, ಆಸ್ಪತ್ರೆ ಹುಡುಕುವುದು, ಸುತ್ತಾಡುವುದು, ಅನಗತ್ಯ ಪರೀಕ್ಷೆ ಮತ್ತು ಚಿಕಿತ್ಸೆ ಇತ್ಯಾದಿಗಳ ಮೇಲೆ ಸಾವಿರಗಟ್ಟಲೆ ಪೋಲಾಗುವುದನ್ನು ತಡೆಯಬಹುದು, ಆತಂಕವನ್ನೂ ನಿವಾರಿಸಿ ಮನೆಯಲ್ಲೇ ಉಳಿದು, ಯಾವ ಚಿಕಿತ್ಸೆಯೂ ಇಲ್ಲದೆ ಧೈರ್ಯವಾಗಿದ್ದು ಗುಣಮುಖರಾಗಬಹುದು.

Please follow and like us:
error
error: Content is protected !!